Ghjè, in u 1983, cù un dipartimentu è una quarantina di studienti, ch’ellu hè statu creatu l’IUT di Corsica. Oghje ghjornu, prupone filiere di furmazione diversificate ind’i duminii di a gestione, di l’intraprenariatu, di e tenniche di cumercializazione, di e nove tennulogie infurmatiche di a cumunicazione, di l’audiovisivu, di a biolugia girata versu l’agroalimentariu o l’ambiente, di l’igiene è di a securità, di u geniu civile, di l’acqua o l’energie rinnuvellevule.
 
Per mezu di parechji partenariati realizati cù università di sfarenti paesi è cuntinenti, l’IUT di Corsica prupone dinù ind’a so carta di furmazione, un Diploma Universitariu di Studii Tennulogichi à l’Internaziunale.
 
Hè pruvistu di sei dipartimenti, di nove licenze prufessiunale è di dui Diplomi Universitarii. À ogni rientrata, accoglie quasi 600 studienti.

U nostru scopu hè di tuccà l’eccellenza in quantu à l’inserzione prufessiunale di a ghjuventù è di diventà ne una referenza. Ghjè in stu sensu chè nò mettimu in ballu parcorsi prufessiunalizanti è qualificanti (in furmazione iniziale, in alternanza è in furmazione cuntinua), in lea diretta cù i bisogni è l’attese di e strutture stituziunale è prufessiunale lucale.

Cuntemu, per sta missione, nantu à una squadra dinamica, cù persunali amministrativi è prufessurali stretti trà di elli è attenti à l’inquadramentu di i studienti. Tutti inseme vulemu dà ci di rimenu di pettu à l’evuluzione leste di u mondu suciale è ecunomicu, ma dinù di i mistieri d’avvene.

Cù l’apertura di un campus novu, avemu u piacè di riceve vi ind’un spaziu adattu à l’amparera è à a crescita di e vostre cumpetenze. Si vò sceglite l’IUT, travaglierete ind’un’imbienza seria quant’è alegra. Averete l’oppurtunità d’acquistà l’arnesi chì vi permetteranu di riesce a vostra inserzione prufessiunale, favurizendu attempu a pussibilità di cuntinuà i vostri studii da pudè persunalizà u vostru parcorsu di furmazione.