E furmazione (LP è DU)
Licenza Prufessiunale : Tenniche è Attività di a Maghjina è di u Sonu
U scopu di a licenza hè d’assicurà a missione d’assistente, è ancu di capu di postu, ind’i tutti i settori di a cuncezzione è di a realizazione audiovisiva (l’imprese di a produzzione, i canali di televisiò è di radio, i studio di creazione d’appiegazioni interattive, l’imprese culturale, e cullettività lucale).
A furmazione hè girata versu una logica di prughjetti quenti. I studienti seguiteghjanu corsi leati in modu direttu à l’appiegazione pratica in preparazione, filmera è postproduzzione.
Puderanu i studienti mette in usu i so acquisti per mezu di a realizazione di fizzione, di documentarii è di filmi di cumanda.
L’annata prevede un stasgiu prufessiunale da 3 à 5 mesi cù l’elaburazione di un raportu di stasgiu è di una presentazione urale.
Per a spezializazione audiovisiva
Cumpetenze : Assicurà a missione d’assistente, è ancu di capu di postu, ind’i tutti i settori di a cuncezzione è di a realizazione audiovisiva (l’imprese di a produzzione, i canali di televisiò è di radio, i studio di creazione d’appiegazioni interattive, l’imprese culturale, e cullettività lucale).
Esempiu di mistieri : Assistente realizatore, Secretariu di produzzione, Assistente sonu, Tennichente di sonu, Ingenieru di u sonu, Operatore di presa di viste, Assistente operatore, Assistente montore, Montore, Produttore, Assistente di produzzione, Incaricatu di produzzione, Regidore.
Stasgiu in impresa :
L’annata prevede un stasgiu prufessiunale da 3 à 5 mesi cù l’elaburazione di un raportu di stasgiu è di una presentazione urale.
Licenza Prufessiunale : Qualità Salute Securità Ambiente
A licenza prufessiunale « Qualità-Salute-Securità-Ambiente » hà per scopu di furmà tennichenti in capacità di mubilizà l’arnesi è i mezi necessarii à l’elaburazione, a messa in opera è l’animazione di un:
Sistema di Gestione di a Qualità (in francese u SMQ),
Sistema di Gestione Ambientale (in francese u SME),
Sistema di Gestione di a Securità (in francese u SMS),
Sistema di Gestione integrate Qualità Securità Ambiente (in francese QSE).
Scopi in qualità di cumpetenze prufessiunale à acquistà
U tennichente hè capace d’assicurà e missione da :
Cuncepisce è mette in ballu u pianu, e dimarchje è l’azzione qualità
Elaburà, scrive è fà evuluà e prucedure è altri documenti qualità è cuntrullà a cunfurmità di a so appiegazione
Sensibilizà è furmà i persunali à a dimarchja qualità
Analizà e situazione ch’ùn sò micca cunforme, definisce è precunizà l’azzione currettive è cuntrullà a so messa in opera
Seguità, analizà e date qualità è determinà l’evuluzione, megliuranze
Cunsiglià è purtà un appoghju tennicu à i servizii, à i clienti (cuncezzione, elaburazione, …)
Assicurà a gestione, a messa in piazza è u seguitu di un sistema d’assicurenza qualità è di gestione di i risichi è di l’ambiente
Assicurà per u contu di l’impresa a veghja regulamentaria, nurmativa è tennulogica
Participà à a megliuranza di i pruceduti di fabbricazione, di l’urganizazione di a produzzione è di i materiali produttivi
Sopravede u cuntrollu di e materie prime, di i mezi di produzzione, di i produtti mezi-compii è di i produtti finiti
Ripresentà a sucetà ind’e relazione cù i clienti, i furnidori è i servizii ufficiali di cuntrollu
Animà squadre di tennichenti è/o di quadri
Animà furmazione à a qualità
Licenza Prufessiunale : Cumerciu Mercatica è Cumunicazione
U duminiu di u cumerciu, à livellu isulanu, naziunale è ancu internaziunale, apre di più in più sbocchi prufessiunali. À fil’di tempu, dopu à a dumanda di l’imprese è à l’attese di i studienti, s’hè allargata a LPC à sfarenti duminii d’attività (banca, BTP, trasporti, turisimu, ecc.).
Eppo, durante u decenniu scorsu, i legami stabiliti (in qualità di scambii è di partenariati) cù u mondu suciale è prufessiunale permette di custatà chì a ricerca di « multi-cumpetenze » hè apprezzata assai da i capi d’impresa (esempiu : un assistente mercatica cù cumpetenze in cumunicazione, un incaricatu di cumunicazione cù nuzione di cumerciu, un capiprughjettu vendita è cumunicazione, ecc.).
In questu sensu, a LPC s’hè aperta à orizonti novi à partesi da a rientrata di u 2013 cù a spezialità « Mercatica è Cumunicazione ».
L’interessi di l’avvicinanza di a mercatica è di a cumunicazione
A mercatica è a cumunicazione : elementi cumplementarii di e strategie di sviluppu di l’imprese.
Cullaburazioni trà i dui mistieri stretti di più in più.
Un ambiente ecunomicu è suciale favurevule à a doppia cumpetenza.
(a doppia cumpetenza ghjè una bona, pò ripresentà un elementu d’inserzione prufessiunale di prima trinca).
I scopi di a Licenza Prufessiunale Cumerciu Mercatica è Cumunicazione sò di :
permette l’acquistu di una cultura generale seria in quantu à a gestione cumerciale/mercatica, ma dinù l’amparera è a maestranza di e tenniche di gestione.
preparà i candidati à i mistieri di u cumerciu è di a vendita è ancu à e funzione d’inquadramentu è di gestione cumerciale.
In questu sensu, permette sta furmazione di :
acquistà e cumpetenze in lea cù a gestione cumerciale di una urganizazione,
cunnosce è capisce u funziunamentu di i mercati isulani, naziunali è internaziunali,
sapè cumu prupone una offerta mercatica uriginale (è ancu una offerta in linea),
apprezzà megliu u so cliente futuru è u so ambiente ecunomicu. I studienti averanu cusì l’uccasione di benefizià d’arnesi perfurmenti è di tennica mercatica necessaria à una più bona cumprensione di u so cliente è à una megliuranza di i risultati di una impresa,
sapè custruisce un pianu di cumunicazione pertinente,
capisce megliu u legame trà a mercatica è a cumunicazione,
acquistà arnesi infurmatichi permettendu li una più bona cumprensione di u web (in particulare di u web mercante).
Licenza Prufessiunale : Intraprenariatu
A Licenza Prufessiunale "Intraprenariatu" di l’IUT di Corsica hà per scopu di furmà à a ripresa è à a creazione d’impresa o à u sviluppu di servizii novi in strutture chì sò digià in attività.
L’insignamenti realizati permettenu l’acquistu:
- di una forte cultura d’impresa ;
- di cunniscenze di i settori d’attività ;
- di a maestranza ghjuridica amministrativa è cuntabile di una urganizazione ;
- di l’amparera di tenniche di gestione ;
- di e tenniche di cumunicazione ;
- di e tennulogie nove di l’infurmazione ;
Da a teuria à a pratica, in particulare per mezu d’appiegazioni cuncrete: stasgiu, prughjetti pedagogichi è prufessiunalizanti.
I prughjetti tutorati è stasgii
U prughjettu tutoratu
Permette di mette in pratica l’acquisti di a furmazione è d’avvezzassi cù u travagliu in gruppu. Si face stu prughjettu in cullaburazione stretta cù un insignante. Ghjova in l’elaburazione di un prughjettu nantu à tematiche propie à l’agroalimentariu.
U stasgiu
Sò ubligatorie 16 simane minime in impresa.
U stasgiu in impresa averà per scopu di:
•Permette à u candidatu d’entre in « cuntattu direttu » cù u settore prufessiunale
•Mette in appiegazione e so cunniscenze in l’impresa
U stasgiu hè direttu da un insignante è un prufessiunale. Hè designatu l’insignante secondu u duminiu d’appiegazione di u stasgiu, per ch’ellu ci sia una relazione forte trà u sughjettu trattatu è e cumpetenze di l’insignante chì seguiteghja u studiente.
Si compie da un rapportu scrittu è da una presentazione urale davanti à una Ghjuria cumposta d’insignanti è di prufessiunali.
Licenza Prufessiunale : Acqua è Ambiente
U scopu di a licenza hè di furmà agenti di maestria è quadri ind’i duminii di a gestione di l’acqua per rende li autonomi è in capacità di:
- cunsiglià i decidori stituziunali o privati ;
- cuncepisce prughjetti ;
- gestisce stallazione cumplesse.
E cumpetenze insignate ind’u quadru di sta furmazione sò attempu tenniche (inquadramentu di una squadra di tennichenti è cuncezzione di prughjettu in cullaburazione cù u ingenieru) è amministrative (preparazione di un bughjettu, messa in opera di prucedure regulamentarie è passazione di mercati travaglii).
Licenza Prufessiunale : Geniu Civile
U scopu principale hè l’inserzione prufessiunale ind’i mistieri di u bastimentu. Tutta a furmazione hè messa in ballu in stu sensu :
• U ritmu di i corsi (1 mese in furmazione/1 mese in impresa) favurizeghja a realizazione di un cuntrattu d’amparera o di prufessiunalizazione.
• A squadra pedagogica, furmata à 70 percentu di prufessiunali di u settore (in Corsica è in cuntinente) travaglia in cuuperazione cù e principale imprese isulane di u settore di u BTP è a cullettività territuriale di Corsica.
• Sò mubilizate e sfarente strutture prufessiunale è stituziunale dispunibile nantu à u pianu lucale, per assicurà u sviluppu di a Licenza Prufessiunale Geniu Civile è Custruzzione : l’imprese, e federazione dipartimentale di u BTP, u MEDEF, e cullettività lucale, …
• I studienti anu accessu à un materiale pedagogicu è infurmaticu perfurmente di l’ultima generazione in quantu à l’avanzate tennulogiche, scientifiche è industriale.
• Ghjè impurtante assai l’insignamentu giratu versu u prughjettu, veru stintu di e pratiche prufessiunale.
Dopu à a Licenza Prufessiunale Geniu Civile è Custruzzione menzione « Tennulogie di l’Alta Perfurmanza Energetica », sò capaci i studienti di :
• gestisce tuttu o una parte di una uperazione di custruzzione di bastimentu in cimentu armatu o cù una ossatura in legnu.
• identificà l’ambiente legislativu (regulamentazione di a custruzzione, regulamentazione termica è ambientale) è di gestisce in modu finanziariu una uperazione.
• ammaestrà l’aspetti tennichi è prupone soluzioni tenniche ch’ella sia per a struttura di u casamentu o per u so ingutuppu.
• gestisce un cantieru nantu à u pianu umanu è materiale.
Licenza Prufessiunale Energie Rinnuvellevule
Purtata da l’Institutu Universitariu di Tennulogia è a Facultà di Scienze è Tenniche, a licenza prufessiunale "Energia è geniu climaticu" menzione « Energie Rinnuvellevule » permette:
- d’acquistà una metodulugia per u sviluppu di ogni prughjettu MDE è ENR ;
- d’acquistà principii fundamentali di MDE per a realizazione d’audit è diagnostichi energetichi, da pudè precunizà soluzioni efficace ;
- d’acquistà cumpetenze ecunomiche è tenniche per prupone soluzioni raziunale in qualità d’energia ;
- d’acquistà cumpetenze per mette in piazza una dimarchja qualità ind’u settore industriale o quellu di u bastimentu ;
- d’acquistà cumpetenze trattendu di a gestione di una impresa.
Licenza Prufessiunale : Banca
U settore bancariu hè in traccia di cunnosce una situazione ch’ùn s’hè mai presentata dapoi più di 30 anni ; un rinnovu impurtante di a so populazione.
Dapoi u 2012, un terzu di l’impiegati hà cuminciatu à piglià a so ritirata, è, ci hè in u listessu tempu un sviluppu cuntinuu di i so sfarenti mistieri : in particulare, di a banca di detagliu, pruvista assai in impieghi è di a quale l’attività cresce assai, postu chì 82 percentu di l’impiegati travaglianu in stu duminiu.
Cù una tassa d’impiegu di 9,4 percentu, a prufessione bancaria ricruteghja quasi 30 000 cullaburatori novi à l’annu di i quali a medità sò ghjovani di menu di 25 anni. Nantu à 100 ghjovani impiegati in CDI ind’e banche, sò più di 15 à avè seguitatu una furmazione in alternanza.
Ghjè in stu sensu chì a Licenza Prufessiunale Banca di l’IUT di Corsica forma i studienti ch’ella sia à livellu di l’assimilizazione, di a maestria di i produtti è tenniche bancarii o di u sviluppu di tenniche cumerciale girate versu u duminiu di a banca è di l’assicurenze. U scopu hè di furmà tennichenti-cumerciali nantu à u mercatu di i particulari ind’u settore bancariu. Hè realizata sta furmazione in lea stretta cù e rete di banca e più presente in Corsica (Crédit Agricole, Caisse d'Epargne Provence et Corse, Le Crédit Lyonnais, Crédit Mutuel Méditerranée, Banque Populaire Provençale et Corse).
A Licenza Prufessiunale banca in alternanza hè un diploma universitariu uriginale à livellu baccalaureatu +3, giratu versu a prufessiunalizazione è arrichitu da u partenariatu IUT, CFPB è CFA Università.
U scopu generale di a furmazione hè di furmà cunsiglieri gestiunarii di clientella nantu à u mercatu di i particulari.
Per rende più efficace a furmazione "terrenu" acquistata di modu prugressivu in l’impresa bancaria, a furmazione pruposta da l’IUT è u CFPB hà per scopu a maestranza di e cunniscenze fundamentale è l’acquistu di u sapè fà "mistieru".
A furmazione si face in dui simestri da settembre à ghjennaghju è da ferraghju à ghjugnu. Hè pruposta in alternanza cù un ritmu regulare di duie simane in impresa da settembre à ghjugnu. Eppo u studiente travaglia in banca sinu à a fine di u so cuntrattu d’amparera.
Licenza Prufessiunale: Attività è Tenniche di Cumunicazione Spezialità Design Numericu
Risponde sta licenza à a specificità di u mondu ecunomicu reghjunale ind’i duminii di e NTIC è di a cumunicazione.
Infatti, in Corsica, ci hè assai micro imprese, è sò assai larghe e faccende attribuite à i spezialisti di a cumunicazione è di u grafisimu.
In questu modu, a Licenza Prufessiunale "Attività è Tenniche di Cumunicazione Spezialità" Design Numericu forma spezialisti di a cuncezzione numerica in capacità di risponde à una dumanda ind’u PRINT, u WEBDESIGN è u MOTION DESIGN.
Sò spartuti l’insignamenti secondu 4 parte di una impurtanza para:
- un insignamentu di cultura generale in giru à u multimedia (inglese, business plan, arte numericu, gestione di prughjettu, furmati numerichi, aspetti ghjuridichi, cumunicazione)
- un insignamentu praticu WEB (Webdesign, prugrammazione, riferimentu, ergonomia, aspetti ghjuridichi, Flash, cumerciu elettronicu)
- un insignamentu praticu PRINT (cumunicazione visuale, grafisimu, canale graficu, ritrattu, tipografia)
- un insignamentu praticu Animazione (Motion Design, After Effects, 3D, Flash AS3, Design sonoru)
Dopu à sta furmazione, puderanu i studienti diplumati intervene ind’i trè settori pincipali di a creazione numerica:
L’imprese di u PRINT (stamperie, agenze di cumunicazione)
L’imprese di u Web (Agenze Web, startup)
L’imprese di e Fiure mosse (publicità, sinemà)
Diploma d’Università Creazione è Tenniche Audiovisive è Sinematografiche di Corsica
Stu diploma hà per scopu di fà cresce e cumpetenze di i studienti ind’u duminiu di i mistieri di u Sinemà è di l’Audiovisivu.
2 uzzione:
- Menzione Spezializazione tenniche: fà cresce e so cumpetenze tenniche è tennulogiche.
- Menzione Scrive, Produce è Realizà: ingagiassi ind’una prima realizazione in qualità d’autore-realizadore o in qualità di produttore.
U DU hè apertu à i titulari di un baccalaureatu (o equivalente DAEU). Per a menzione EPR, ci vuleria à avè un baccalaureatu +3 o una sperienza prufessiunale ma ùn hè ubligatoriu. L’accessu à u DU hè sottumessu à una selezzione fatta nantu à cartulare. Un esame urale pò esse dumandatu à u candidatu.
Diploma è certificazione:
Ùn serà attribuitu u diploma chè à i studienti entrendu cù un livellu Baccalaureatu è avendu seguitatu a tutalità di a furmazione.
Diploma d’Università di Studii Tennulogichi Internaziunali
U DUETI hè un diploma d’università validendu a cuntinuazione di studii post-DUT à u fora à livellu L3 (Bachelor).
Hè stimatu u livellu L3, in raportu à e cumpetenze è e cunniscenze acquistate da un studiente di livellu L3 tennulogicu è prufessiunale di una spezialità equivalente in Francia.
U DUETI ùn hè micca una licenza. Ogni dumanda d’entrata in Master 1 in Francia dopu à a validazione di u DUETI hè sottumessa à a prucedura di Validazione di i Studii Superiori (in francese a « VES »).
Un studiente di l’IUT chì vole cuntinuà i so studii ind’un stabilimentu stranieru dopu avè acquistatu u so DUT, pò scrive si à u DUETI currispundendu à a so filiera. A sola cundizione hè d’avè l’accunsentu di u so Capidipartimentu è di l’Incaricatu di e Relazione Internaziunale di l’IUT di Corsica.
U diplomu di studiente impresariu
U diplomu di studiente impresariu di l’iut di corsica prepara à a ripresa d’intrapresa o à a creazione d’intrapresa.
Stu diplomu ripone nant’à una pedagugia à l’inversu chì à parte di u prugettu di u studiente, li si prupone insignamenti in funzione di i so bisogni.
Si pò trattà di una maistranza ghjurìdica amministrativa è cuntàbile d’una organizazione o ancu di l’amparera di e tenniche di u management, di a cumunicazione, di e tennulugie nove di l’infurmazione. A u studiente, li si derà u dirittu di sceglie fin’à settant’ore di corsu frà l’insignamenti pruposti.
Cumpetenze augurate
Cumpetenze trasversale aspettate
Spìritu d’iniziativa : rinsignà si, truvà l’infurmazione è e persone risorse, custituisce si una reta.
Leadership : sapè cunvince / sapè mubilizà è guvernà squadre o cumpagni di squadra
Spirimentazione di l’incertezza da fà nasce a necessità d’insiste
Cunfruntà si à a realità : ricaccià tuttu ciò ch’omu pò da u quatru duve si vole inserisce u prugettu, listà i capatoghji/ d’obligazione è e suluzione/ di risorse.
L’apertura, u sognu, a curiusità, u cuntrastu po a ricerca di u credibile, di u cuncretu, di ciò chì hè in accordu.
Sapè cuncepisce
Sapè esse è ammaestrà a cumunicazione in a squadra.
Pruduce inseme un ducumentu lògicu è prufeziunale.
Capacità di preparà, di cambià è d’aghjustà di modu prufeziunale tuttu scuprendu u mondu di u travagliu.
Cumpetenze di gestione espettate
Creatività : cumu cagiunà idee (mètudi, esercizii, caràtteru), apre si nantu à un sviluppu creativu.
Strutturà un prugettu, custruisce un scenariu, valutà i diversi scenarii, valutà l’idea è a cuerenza di u prugettu.
Analizà un mercatu è a dinàmica di a cuncurrenza, definisce una règula di strategia, integrà u cuntestu sucetale è ambientale.
Definisce un mudellu di travagliu chì cuntene un costu finanziariu in u tempu (u prezzu di fabricazione è di distribuzione, u puntu mortu, u contu di i resultati, u bilanciu, i tavulelli di finanziamentu, u muvimentu di i soldi, i bisogni in fondu di rulamentu)
Finanzà un prugettu (fonte è costu ; banche, fondi publichi è persunali, partenariati.).
Identificà è organizà i mezi à mette in òpera (marcatu, è offerta cummerciale, tenniche, risorze umane.).
Prutege un prugettu (pruprietà intelletuale) è ammaestrà i fundamentali ghjuridichi (dirittu di l’affari, dirittu di u travagliu è dirittu di e sucetà).
Sviluppà una visione stratègica di u prugettu integrandu un slibramentu prontu è stratègicu.
Sapè esse è cumunicà vicinu à i prufeziunali.
Arricà un estimu in raportu cù l’intrapresa : leadership è management
Valutazione di e pruposte
L’iscrizzione in D2E hè data sè u studiente hà ottenutu u statutu naziunale di Studiente Impresariu addestratu da u cumitatu d’ingagiamentu di u PEPITE corsu.
A selezzione porta nant’à a qualità di u prugettu (realità, qualità è dimensione di u prugettuin raportu cù l’intrapresa) è quellu chì u porta è nò nant’à i diplomi ch’ell’hà ottenutu u candidatu.
U studiante chì dumanda una srizzione in D2E devera trasmette un cartulare di candidatura.
Serà addimessu s’è u cartulare cunvene è s’ellu passa un orale davanti à i ghjurati di u cumitatu d’ingagiamentu di PEPITE.
Lega per scaricà u cartulare di candidatura.
U studiante chì dumanda una scrizzione à u D2E deverà trasmette u cartulare addestratu è appruvatu da u cumitatu d’ingagiamentu di PEPITE.
Accunsentu di e candidature
L’acquistu di u statutu naziunale di Studiente Impresariu permette a scrizzione in D2E. u livellu mìnimu ch’omu dumanda hè u bascigliè o diplomu à parità. Tutti i duminii di furmazione sò addimessi. I studienti ch’ùn anu valutatua un livellu BASCIGLIE + 1 averanu un accumpagnamentu specìficu affinchè di valutà u D2E (bascigliè+2) nant’à dui anni da compie a so amperera.
Pùblicu avvisatu : studienti in corsu di furmazione è giovani laureati. Prima, quelli di menu di 28 anni avendu un prugettu da mette in ballu sùbbitu.
Durata di a furmazione
A furmazione dura 1 annu.
Mòdulu di furmazione 70 ore à u più.
Sèguitu di u prugettu è puntellu :10 ore
Travagliu persunale nant’à u prugettu : 710 ore
Contu orariu : 800 ore
Inserzione prufeziunale
Cuntinuità di i studii : equivalenzia BASCIGLIE+2
Licenzia prufeziunale di i mistieri di l’intrapresa
Mistieri : i studienti portanu à fine u so prugettu di creazione o di ripresa per diventà capintrapresi