Institut Universitaire de Technologie | Università di Corsica

DIPLOMA UNIVERSITARIU DI TENNULUGIA

E furmazione (DUT)

Diploma Universitariu di Tennulogia : Geniu Biologicu

"U DUT Geniu Biulogicu si face in dui anni. U nostru scopu hè di furmà cullaburatori tennichi avvezzati à i metudi è e tenniche i più muderni ind’i duminii propii à l’agroalimentariu o à l’ambiente"

Uzzione I.A.B (Industrie Agroalimentarie è Biologiche) 
St’uzzione prupone una furmazione pluridisciplinaria ind’e materie scientifiche di basa, u geniu industriale è alimentariu, è ancu e discipline dette d’adattazione lucale currispundendu à u nostru ambiente ecunomicu è suciale.
 
Deveranu i studienti acquistà è ammaestrà e cunniscenze fundamentale è e tenniche d’analisi chimichi, biochimichi è microbiologichi propii à u geniu biologicu è à u geniu industriale alimentariu, nanzu di participà à l’elaburazione di pruceduti di fabbricazione è di cuntrollu qualità in l’industrie di u settore agroalimentariu.

Uzzione G.E (Geniu di l’Ambiente) 
Deve a furmazione scientifica permette à i studienti d’acquistà parechje cumpetenze in duminii varii assai : fisico-chimia è biolugia di i lochi (polluzione di l’aria, di l’acque è di i terreni, gestione di e rumenzule), analisi di i sistemi vivi è interazzione cù i lochi naturali o mudificati (ecosistema urbani, industriali, campagnoli), cunniscenza è gestione di i lochi naturali, gestione di a qualità di l’acqua, gestione di e rumenzule (scumpartimentu, ricuperu, valurizazione), maestranza di e tenniche d’analisi di l’acqua, di l’aria è di i terreni, funziunamentu di e stazione d’epurazione.
 
Dui terzi di l’insignamenti sò cunsacrati à i travaglii pratichi (in laburatoriu o sopralocu) è à i travaglii diretti. Messa à dispusizione per i studienti d’arnesi d’analisi perfurmenti listessi à quelli utilizati in impresa.
Sò urganizati l’insignamenti in giru à un inseme di moduli.

 

Diploma Universitariu di Tennulogia : Geniu Civile Custruzzione Durevule

Stu diploma hà per scopu principale a furmazione in dui anni di tennichenti superiori è di quadri spezializati di u bastimentu è di i travaglii publichi pudendu mette in usu e so funzione in settori d’attività diversificati assai (nantu à i cantieri, ind’i laburatorii di sperimentazione o i scagni di studii).

Stu DUT prupone corsi in modu cumunu, eppo una spezializazione à l’ultimu simestru versu un parcorsu Bastimentu o Travaglii Publichi. Pò u studiente sceglie moduli in raportu cù u so avvene prufessiunale : cuntinuà i so studii o integrà u mercatu di u travagliu.
 
Hè urganizata sta furmazione in giru à corsi :
- in scienze (matematiche, resistenza di i materiali, stabilità di e custruzzione, meccanica di i fluidi, elettricità, termicu) ;
- in tennulogia (custruzzione, materiali, DAO, topografia, urganizazione) ;
- in cumunicazione (spressione, cumunicazione, lingue, infurmatica).

Si mette un pede in l’ambiente prufessiunale per mezu di dui stasgii in impresa (2 è 8 simane), di u Prughjettu Persunale è Prufessiunale (PPP) è di un prughjettu di fine di studii.

 

Diploma Universitariu di Tennulogia : Gestione di l’Imprese è di l’Amministrazione

"Hè statu u primu dipartimentu creatu à l’IUT di Corsica, in u 1983. Oghje ghjornu, u DUT Gestione di l’Imprese è di l’Amministrazione hà una rinomina sicura, ch’ella sia à livellu reghjunale o nantu à u pianu naziunale. Pruvistu di una grande sperienza, u dipartimentu GEA di l’IUT di Corsica prupone una furmazione mettendu in ballu a teuria è a pratica ind’i tutti duminii di a gestione di una urganizazione (cuntabile, finanziaria, fiscale, di cunducimentu, cumerciale, ghjuridica, logistica ecc.). Si tratta di una furmazione pulivalente, accessibile per mezu di l’amparera è ricercata da l’attori prufessiunali. Pò u studiente sceglie d’integrà u mondu di u travagliu subbitu dopu avè chjappu u so diploma o sceglie di cuntinuà studii diversi. Sapè, sapè fà è sapè esse, sò e parulle maestre di u dipartimentu".

U diploma prupone in seconda annata duie uzzione :
GEA Uzzione G.M.O (Gestione è Cunducimentu di l’Urganizazione)
- Assicurà a respunsabilità di a gestione di ogni ghjornu di una urganizazione ind’i duminii logistichi è cumerciali, ghjuridichi è fiscali, cuntabili è finanziarii.
- Racoltà, sintetizà è utilizà l’infurmazione necessaria à a presa di decisione.
- Ricercà è identificà i sfunziunamenti di una urganizazione megliurendu i sistemi d’infurmazione è neguziendu cù i partenarii cuncernati.
 
GEA Uzzione G.C.F (Gestione Cuntabile è Finanziaria)
- Ammaestrà i metudi, prucedure è tenniche cuntabili, finanziarii è bughjetarii.
- Participà à a messa in piazza di un sistema d’infurmazioni ecunomiche, cuntabile è finanziarie.
- Participà à l’elaburazione è à u seguitu di l’arnesi d’aiutu à a decisione ind’u duminiu ecunomicu è finanziariu.

Prughjettu Tutoratu è Stasgii
 
Serà realizatu un Prughjettu tutoratu durante a seconda annata di DUT GEA. U scopu di u prughjettu tutoratu hè di valurizà u spiritu d’impresa di i studienti adduniti in gruppu.
In prima, mettendu di nanzu e so cunniscenze è e so cumpetenze, è dopu sprimendu a so creattività per cuncepisce è realizà un prughjettu prufessiunale.

Si compie u prughjettu tutoratu cù a redazzione di un raportu è una presentazione urale. Deve u raportu esse rimessu à u secretariatu di u dipartimentu 5 ghjorni almenu nanzu à l’esame. Pò a presentazione urale durà 20 minuti è finisce si cù una seria di dumande.

I stasgii :
- Stasgiu di 3 simane in prima annata (Stasgiu scuperta di l’impresa)
- Stasgiu di 8 simane in seconda annata (Realizazione di una missione in l’impresa)

 

Diploma Universitariu di Tennulogia : Mistieri di u Multimedia è di l’Internet

"M.M.I. forma i studienti à a cuncezzione è à a realizazione di produtti ma dinù di servizii di cumunicazione. I diplumati M.M.I. chjappanu allora una doppia cumpetenza ricercata assai da l’imprese."
 

I diplumati di u DUT "Mistieri di u Multimedia è di l’Internet" di l’IUT di Corsica acquistanu una pulivalenza permettendu li d’intervene attempu ind’a cuncezzione di cuntenuti, a realizazione di i produtti è servizii, a so cumercializazione o a so integrazione in core di una urganizazione.


Puderanu participà à e sfarente attività di realizazione di un prughjettu multimedia è audiovisivu, ma dinù avè funzione d’interazzione è di cuurdinazione di l’inseme di l’attori.

Un prughjettu tutoratu hè necessariu per l’acquistu di u diploma. Si tratta di un travagliu realizatu ind’una agenza (gruppu da 5 à 7 studienti inquadrati da tutori, prufessori è prufessiunali) pudendu piglià a forma di una creazione, di una realizazione, di una prestazione, di un prughjettu, di un studiu di casu praticu, di un cartulare, di un memoriu, ecc…
 

Diploma Universitariu di Tennulogia : Tenniche di Cumercializazione

U DUT "Tenniche di Cumercializazione" forma in 4 simestri à tutti i mistieri di u serviziu è di u cummerciu. 
U studiente titulare di un DUT TC hè pulivalente in ogni tappe di a cummercializazione d'un produttu o serviziu: studiu in terrenu, strategia "marketing", cumunicazione cummerciale, negoziu comprera è vendita, rilazione cliente ecc...

Hà a pussibilità di travaglià in ogni settori di l'attività ecunomica è specificamente in Corsica, in u settore terzariu: banca, assicurenza, gestione di u patrimoniu, immubiliare, comprera è vendita, trasportu, cumunicazione, organizazione d'evenimenti, turismu, grande distribuzione...
Pò travaglià cume: cummerciale, in carica di clienti, assistente cummerciale, tennicu-cummerciale, neguziatore, assistente marketing,rispunsevule cummerciale.
Incu sperienza, pò diventà: direttore di e vendite, in carica di u sviluppu cummerciale, rispunsevule marketing, gestiunariu di magazinu...

Si tratta di una furmazione pulivalente, uragnizata secondu 2 pilastri: Marketing è Cumunicazione.
Issa furmazione permette di sviluppà a so autonomia, u spiritu di travaglià in una squadra è l'apertura.
Incu a pratica di l'inglese è di una seconda lingua strangera si pò parte à studià à l'internaziunale.

STASGII
Durante a so scularità, u studiente face in fine di contu dece simane di stasgiu in impresa :

2 simane in prima annata

8 simane in seconda annata

Permettenu sti stasgii di perfezziunà a cumpetenza uperaziunale di i studienti fendu scopre e realità di u mondu prufessiunale. 

PRUGHJETTI TUTORATI
Sò realizati in seconda annata ind’u quadru di l’impresa di messa in pratica. I studienti, sottu à a direzzione di una squadra pedagogica, s’impegnanu ind’u quadru di missione chì podenu piglià parechje forme : studiu di mercatu, azzione di mercatica diretta, scontri prufessiunali, urganizazione d’evenimenti cumerciali è di manifestazione à scopu umanitariu.

 

Diploma Universitariu di Tennulogia : Igiene, Securità, Ambiente

U dipartimentu HSE di l’IUT di Corsica permette l’acquistu di un Diploma Universitariu di Tennulogia (DUT HSE) dopu à quattru simestri di preparazione. Dà accessu à i mistieri di a prutezzione di l’omi à u travagliu, di a securità civile, di a preservazione di l’ambiente è di a maestranza di i risichi (naturali, industriali…).
U scopu hè di furmà tennichenti in capacità d’identificà i periculi, di valutà i risichi, di prupone soluzioni à i decidori è di participà à a messa in opera di e misure scelte. U rollu di stu tennichente hè quellu di un cunsiglieru, di un animatore capace di sensibilizà, furmà è cunvince.

U DUT "HSE" hè apertu in parcorsu iniziale à i ghjovani baccillieri. Una selezzione hè fatta da una ghjuria d’insignanti è di prufessiunali nantu à cartulare, pigliendu in contu e note è l’apprezzazione di u librettu sculare.
A furmazione si pò seguità dinù in alternanza à partesi da a seconda annata.
Mezi pedagogichi:
insignanti impegnati assai ind’u duminiu prufessiunale,
intervenenti prufessiunali,
partenariati cù imprese o organisimi lucali,
materiali è arnesi pedagogichi,
seguitu persunalizatu di i studienti.
 
 Prughjetti tutorati :

I studienti, in picculi gruppi, realizeghjanu un studiu ind’u duminiu HSE.
U scopu di sti prughjetti hè di mette in usu e cunniscenze scientifiche, tenniche, ghjuridiche è umane necessarie à a furmazione. Si face per mezu di esercizii cuncreti.
Prughjettu Persunale è Prufessiunale :
U scopu hè d’assicurà a cuerenza a più bona ch’ellu si pò trà e facultà persunale di i studienti è a realità di i mistieri.
Amparà altrimente :
Si tratta d’andà più luntanu à livellu di e cunniscenze acquistate per mezu di u tutoratu, di l’usu di e tenniche infurmatiche di cumunicazione è di u travagliu persunale.  

Page mise à jour le 21/02/2017 par ANTEA GALLET